Sotto, Clarkson wala sa China pocket tourney

CEBU, Philippines —  Migikan na padung sa China ang Gilas Pilipinas ang sa ilang kataposang pagpangandam sa umaabot nga FIBA World Cup nga mahitabo karong Agosto 25, 2023.

Apan medyo haw-ang ang team sa ilang pag-adto didto tungod kay daghan sa mga ‘key players’ niini ang wala makakuyog sama nilang NBA star Jordan Clarkson, Kai Sotto, Justin Brownlee, Scottie Thompson ug Ange Kouame.

Ang Gilas mosalmot sa pocket tournament didto sa China batok sa Senegal ug Iran pinangunahan sa national team coach Chot Reyes.

Si Reyes miangkon nga maayo ra ang iyang mga batos ug taas kaayo ang panglantaw sa umaabot nga torneyo. Apan giangkon sab niya nga layo pa kaayo ang ilang kaandam karon sa gusto niyang mahitabo.

“The team is feeling fine. We’re in good spirits…But as to where we are now, we’re far off from where we want to be,” matud pang Reyes sa ambush interview kaniya sa mga tigbalita sa Ninoy Aquino International Airport samtang nagpaabot sa ilang flight.

Duna pay  kapin duha ka semana ang Gilas nga makapangandam apan mubo na kaayo kini nga panahon maong dako kaayong hagit para sa koponan nga makab-ot ang peak readiness niini ilabi na daghan sa iyang mga gikinahanglang players ang dili makakuyog sa China.

Matud niya, ayha pa siya makasulti nga andam na gyud sila kun ang tanang players makatambong tanan sa mga praktis.

“We hope that when everyone comes together and all the players are in, then we can make up [for] that discrepancy,” sumala pa niya.

 Si Clarkson moabot dinhi sa Pilipinas sa Agosto 8 pa, samtang si Sotto dili na makakuyog sa China tungod kay nagpaalim pa kini sa iyang injury sa likod. Si Kai namahayag nga gusto niyang moduwa nga 100 porsiyento na siyang piskay ang lawas.

Samtang si Thompson wala pa mahatagi og clearance aron makabalik og duwa tungod sa injury niini sa iyang tudlo. Ang naturalized player nga si Brownlee gikinahanglan pa sab magpaalim sa dugay na niyang injury aron maandam siya sa umaabot nga Asian Games.

Hinuon, konswelo nan i Reyes nga nangaayo na gikan sa injuries silang Roger Pogoy, Calvin Oftana, ug  Ray Parks ug nakaapil na sab sila sa mga praktis.—IBM