Sige’g pakita’s boobs!

Dear Tito Miguel ,

Maayong adlaw, ako diay si Ariel, taga Labangon, Cebu City. Napungot nako sa kinaiya sa akong girlfriend nga sige'g bandera sa iyang boobs sa social media. Proud kay siya sa iyang sexy photos sa Facebook kun diin klaro kaayo ang iyang boobs. Bisan unsaon og badlong, dili jud mopatuo. Dili gyud bitaw ko komportable sa iyang photos . Unsa ang angayan nakong buhaton ? —Ariel

Ariel,

Exhibitionist imong uyab, mapasigarbohon sa iyang lawas labi na ang pribado nga parte niini. Sa laktod, patagad. Maski unsa pay isulti sa mga tawo, positibo man o negatibo, nakuha niya iyang kinaham nga atensyon. Mao nga dili maminaw nimo maski unsao’g badlong. Inay nga mopatuo, nigara’g maayo, kay natandog niya ubang tawo, labi na ikaw. Istoryaha kausa. Ingna dili ka kumportable nga iyang mga hulagway piyestahan sa mga lalaki. Kinahanglan disente siya ug mo-respeto nimo isip uyab. Kun sige siya’g pakita sa iyang boobs, mawala na iyang misteryo, sum-ol na tan-awon. Ang mga artista man gani, pili-on sa ilang handlers unsay ipagawas nga mga litrato ug kun kanus-a. Kay kun sila over-exposed, wala nay pangitaon, hinangpon ug kamingawan nila sa publiko. Labaw sa tanan, nabarato siya. Ang tindahan sa mga mahalon nga baligya nihit ug pangitaonon, pero ang baratilyo ug ukay-ukay dali ra tultolon. Kun dili maminaw, sakyi apan limitahi. Hangyoa kun mahimo ipatan-aw usa nimo ang mga hulagway sa dili pa niya ipatik, pili-a’g dayega ang disente’g nindot, ipalabay ang laksot. Sa maong paagi wala nimo badlonga, gikuhaan ra.

Kun magbuot gyud, pasagdi. Total dugay na man siya nagbuyangyang. Ayaw na’g tingog maski unsa pa iyang ipatik. Apan hinay-hinay’g distansiya, di ba matingala. Kun mangutana, ingna imo siya gipasagdan kun asa siya malipay, busa angay sad ka niya pasagdan. Diha na ma-alarma, basin magtarong na. Kun dili gihapon, naa ra nimo’g mopadayon sa babaye nga ma’s ganahan magpakita sa tanan kay sa maminaw sa kaniya nagmahal. Tito Miguel

Magpatambag ka? Ipada kang Tito Miguel: 0998-581-5856