Nagpapolis-polis nadakpan
CEBU, Philippines — Kompleto sa uniporme, dunay armas, bullet proof vest ug Pershing cap ug tsapa, walay magdudang dili polis ang usa ka lalaking gidakop sa mga tinuod nga polis kagahapon sa hapon diha sa JP Rizal St. sa Barangay Basak sa Mandaue City.
Ang suspek giila sa kapolisan nga si Gabriel Santino Tac-an, 33, minyo, ug nagpuyo sa Avalon Condominium, Barangay Hipodromo sa Cebu City.
Si Police Lt. Colonel Rudolf Oriol, deputy director for operations sa Mandaue City Police Office nga nakahinabi sa Banat News miingon nga dunay ka-meet up nga 15 anyos nga babaye si Tac-an diha sa maong dapit, apan ang dalagita nakuyawan kay nagpaila kining polis.
Ang bata mibutyag nga nagkaila sila sa suspek pinaagi sa Facebook. Ang bata nahadlok gikatahong nitawag sa police station (duol ra sa lugar) hinungdan sa pagresponde sa mga polis.
Gisita kini ug gipangitaan og PNP ID ug uban pagpamatuod nga kini sakop sa PNP apan napakyas maong gidiretso kini og dakop.
Nabantayan na sab daaan nga bisan sa pagsuot sa iyang PNP paraphernalia wala magkadimao maong nisamot ang pagduda sa mga polis.
Nakuha gikan sa suspek ang usa ka PNP Badge, nameplate nga dunay pangalang Tac-an, duha ka improvised nga plaka sa sakyanan nga pareho og numero (GAB 6091), duha ka paketeng gidudahang shabu, usa ka kalibre .38 caliber nga dunay walo ka bala, usa ka kalibre .45 pistolang toy gun, duha ka hand held radio, usa ka Pershing cap, usa ka bullet vest, sling bag, cellular phone, LTO ID, facemask, usa ka kahang sigarilyo, pecha korno ug baseball bat ug sakyanan.
Ang suspek gikatakdang pasakaan og kasong Usurpation of Authority, possession of illegal firearms and ammunition, possession of illegal drugs ug gitanggong na diha sa Police Station 3 sa Mandaue City Police Office. —/IBM (BANAT NEWS)
- Latest
