Gilas kakasahan ang Iran sa China tilt
MANILA, Philippines — Sisimulan ng Gilas Pilipinas ang kampanya nito laban sa Asian powerhouse Iran sa pag-arangkada ngayong araw ng 2023 Heyuan WUS International Basketball Tournament sa Guangdong, China.
Haharap ang Pinoy cagers nang wala ang ilan sa key players nito kabilang na sina Utah Jazz star Jordan Clarkson, Kai Sotto at reigning PBA MVP Scottie Thompson.
Kaya naman nakasalalay ang lahat sa mga beteranong miyembro ng pool sa pangunguna nina dating PBA MVP June Mar Fajardo at Japeth Aguilar.
Direktang tutungo sa Maynila si Clarkson mula sa Los Angeles sa susunod na linggo habang nagpapagaling pa sa back injury ang 7-foot-3 na si Sotto.
May injury din si Thompson kaya’t hindi ito nakasama sa China pocket tournament. Pagdating sa China, agad na sumalang ang Gilas sa ensayo sa Heyuan Sports gymnasium na siya ring magiging venue ng torneo.
Bukod sa Iran, makakaharap ng Gilas sa pocket tournament ang Senegal — ang koponang tinalo ng Pinoy squad noong 2014 FIBA World Cup sa Seville, Spain via 81-79 overtime win.
Sa naturang panalo, bahagi sina Fajardo at Aguilar ng Gilas squad.
Makakaharap ng Gilas ang Senegal sa Biyernes.
- Latest
