Chop-chop na katawan, natagpuan

CAVITE, Philippines — Matapos matagpuan ang isang putol na paa ng tao habang lulutang-lutang sa ilog sa lungsod ng Gen. Trias, isang putol na katawan ng tao naman ang natagpuan sa madamong bahagi ng open canal ng Brgy. Pasong Camachile 2, sa nasabi ring lungsod, kamakalawa ng hapon.

Sa ulat ng pulisya, alas-5 ng hapon nang matagpuan ng ilang re­sidente rito ang putol na katawan ng tao sa madamong bahagi na malapit sa ilog, isang araw matapos makita ang inanod na putol na paa ng isang tao.

Nabatid na walang ulo, kamay at paa ang nadiskubreng katawan at hinihinalang may ilang araw na ring babad sa tubig. 

Inaalam pa ng pulisya kung may kaugnayan ito sa natagpuang isang putol na paa ka­makalawa sa Bacao River ng nasabi ring lungsod.