Animam, Bernardino gigiya sa Gilas Women’s sa Jones Cup

MANILA, Philippines — Babanderahan nina veteran Jack Animam at Afril Bernardino ang Gilas Pilipinas women’s team sa dara­ting na 2023 William Jones Cup tournament sa Taiwan.

Makakalaban ng Gilas women’s squad sa Jones Cup na nakatakda sa Agosto 5 hanggang 9 ang Chinese Taipei-A, Chinese Taipei-B, Japan at Korea.

Kakapirma lang ng 6-foot-5 na si Animam sa Wuhan Shengfan Professional Basketball Club ng Women’s Chinese Basketball Association (WCBA).

Nauna nang naglaro ang 24-anyos na dating kamador ng National University Lady Bulldogs sa UAAP para sa ŽKK Radni?ki Kragujevac sa Serbia at sa Toulouse Métropole Basket at USO Mondeville sa France.

Sa pagsalang ng mga Pinay cagers sa nakaraang 2023 FIBA Women’s Asia Cup ay nagtala si Animam ng mga averages na 10.0 points, 9.6 rebounds at 1.4 steals sa limang laro.

Hindi naman makakalaro si Fil-American guard Va­nessa De Jesus na nagkaroon ng knee injury at sina Khate Castillo, France Cabinbin at Trina Guytingco.

Samantala, gagawin nina Fil-Am Malia Bambrick ng Pepperdine University at Kacey Dela Rosa ng Ateneo Lady Eagles ang kanilang national team debut.

Ang iba pang miyembro ng Gilas Pilipinas women’s squad ni coach Pat Aquino ay sina Monique del Carmen, Janine Pontejos, Stefanie Berberabe, Jhaz Joson, Louna Ozar, Andrea Tongco, Gabi Bade at Sofia Roman.